USA Gamsung aa Om Zomi U leh Nau te,
A beisa kum nih kum 3 sung in, eimi sung ah hong kidong mun mahmah thu in:
1). Tax file na pen mun khat leh munkhat kibang lo aa, state dang khawng pan file leng tam kingah thei zaw ci ven bang cihding ka hiam?
2). Nupa kikhen in bawl in tuam file leng ahoih zaw ding hiam?
3). Ka tate midang innkuan sung ah guang in a mau file sak leng sumtam kingah thei ci in, a mau sum bangzah hiam hongpia kik ding uh hi, bangcih ding ka hiam?
cihdan hong kidong mun mahmah hi.
Ih theihtek ding aa kisam kasak thu in, a manmah aa ih file tekding hong hanthawn nuam ing. Pawlkhat in kumpi khembawl in tax file uh aa, a ngah ding uh sang a tamzaw tham a ngah om hihtuak hi. A hizong in, pawlkhat pen kumpi lampan thei kik aa, kizui kik a hih man in, tua zawh kum 2 kum 3 ciang a val aa a ngah teng kumpi tung ah a piak kik kul ban ah a met tawh lohsak kik a hih man in tampi tung aa -- piakding neilo aa a buai pawlkhat om hi.
Tua ban ah, tu lian in Tax Return tam ngah theihtheih nading ci in nupa vai khawng ah zuau gen khak te pen, ta leh nau te College khawng kah nuam in, kumpi tung ah huhna ngen le hang tua hunciang thu nungkan kik uh aa, ih khemna teng hong kilang in ki nung buai thei hi.
Tua a hih man in, nupa kiteng lai gegu khawng a kikhen dan aa bawl ding hoihlo hi. Nang ii ta te gegu midang te ta dan aa bawl aa ah social security number uh zatsak pen, hong kizui kha leh kumpi upadi (law) palsat hi aa, thong (prison) na ngawn a kitung thei thu a hihi. Kumpi lam ten ih social security number tawh kan le uh na khempeuh a kilang pah a hih man in kidop huai aa, tu tawm aa ngahding huaiham na tawh a manlo aa ih sepkhak loh ding a thupit na hong theisak ing.
Deihsakna tawh,
Chin Do Kham
Vice President
Zomi Innkuan USA